Stuhia “Agneta” ka goditur disa zona të Greqisë, duke lënë pas përmbytje, rrugë të dëmtuara dhe dhjetëra automjete të marra përpara nga ujërat. Rodosi rezulton mes pikave më të prekura, ndërsa autoritetet greke kanë aktivizuar alarmin për kufizimin e lëvizjeve, në pritje të një përkeqësimi të mëtejshëm të motit.
Rodosi nën ujë pas orësh të gjata reshjesh
Pamjet e publikuara nga kamera amatore tregojnë rrjedhën e furishme të ujit në rrugët e ishullit të Rodosit, ku reshjet e dendura kanë shkaktuar situatë problematike në disa zona.
Në Arhangelos, në lindje të ishullit, lumi doli nga shtrati pas rreth 17 orësh reshjesh të pandërprera, duke sjellë dëme të konsiderueshme në rrugë dhe infrastrukturë.
Dhjetëra makina të dëmtuara, banorë të izoluar
Sipas të dhënave të deritanishme, të paktën 60 automjete janë rrëmbyer ose dëmtuar nga ujërat, ndërsa dhjetëra banesa dhe biznese janë përmbytur.
Në disa raste, banorët janë detyruar të ngjiten në çatitë e shtëpive, ndërsa zjarrfikësit kanë ndërhyrë me dhjetëra operacione për nxjerrjen e personave të bllokuar.
Mesazhe emergjence dhe kufizime në lëvizje
Sipas autoriteteve greke, gjatë natës dhe në orët e para të mëngjesit janë dërguar disa mesazhe paralajmëruese nga numri i emergjencës 112, me thirrje që banorët dhe turistët të lëvizin vetëm kur është absolutisht e domosdoshme.
Në zonat më të prekura, shkollat kanë qëndruar të mbyllura, ndërsa qarkullimi i automjeteve është ndërprerë në disa pika në jug të Rodosit.
Stuhia pritet të shtrihet edhe në zona të tjera
Sipas parashikimeve të sinoptikanëve, stuhia “Agneta” nuk pritet të largohet shpejt nga Greqia. Reshje të forta dhe stuhi parashikohen sërish në Dodekanez gjatë ditës, ndërsa sistemi meteorologjik pritet të zhvendoset drejt ishujve të detit Jon dhe Greqisë perëndimore.
Të martën, moti i keq pritet të prekë edhe Maqedoninë Qendrore dhe Lindore, Trakën, si edhe ishujt e Egjeut Verior dhe Lindor. Vetëm tre javë më parë, një tjetër stuhi në të njëjtën zonë u shoqërua me përmbytje dhe, sipas raportimeve, shkaktoi vdekjen e një 62-vjeçari.
Situata mbetet e paqëndrueshme në disa ishuj dhe në pjesë të Greqisë qendrore, ndërsa pesha reale e dëmeve pritet të bëhet më e qartë vetëm pasi reshjet të tërhiqen.
Për momentin, bilanci paraprak flet për infrastrukturë të goditur rëndë, banesa të përmbytura dhe një alarm të ri për orët në vijim.