TIRANË – Përplasjet e regjistruara të enjten përpara Kuvendit të Shqipërisë kanë tërhequr vëmendjen e disa prej mediave dhe agjencive më të mëdha ndërkombëtare, të cilat i kanë kushtuar hapësirë zhvillimeve në Tiranë dhe përshkallëzimit të protestës së njohur si “Revolucioni i Flamingove”.
Ajo që nisi si një lëvizje kundër projekteve të debatueshme të zhvillimit në bregdet është shndërruar në një përballje të hapur politike, me tensione që po ndiqen nga afër edhe jashtë vendit.
Në ditën e 33-të të protestës, situata u përshkallëzua kur një grup protestuesish tentoi të bllokonte hyrjen e deputetëve dhe anëtarëve të qeverisë në seancën plenare, ndërsa drejt automjeteve të tyre u hodhën vezë dhe sende të tjera. Më pas ndërhyri Policia e Shtetit, e cila përdori topa uji, gaz lotsjellës dhe sprej piper për shpërndarjen e turmës. Sipas autoriteteve, nga përplasjet mbetën të lënduar efektivë policie dhe qytetarë.
Mediat e huaja fokusohen te protestat dhe projektet e debatueshme
Reuters e paraqet situatën si një provë të rëndësishme politike për kryeministrin Edi Rama, duke theksuar se protestat zhvillohen në një kohë kur qeveria përballet me kritika për korrupsionin dhe cilësinë e shërbimeve publike.
Ndërkohë, Bloomberg, Euronews dhe media të tjera ndërkombëtare e lidhin zanafillën e protestave me kundërshtimet ndaj projekteve të zhvillimit në bregdet, përfshirë investimet e propozuara nga Jared Kushner dhe kompani të lidhura me të, çështje që ka ndezur debat publik si në Shqipëri, ashtu edhe jashtë saj.
Pamjet e përplasjeve mes protestuesve dhe policisë u transmetuan gjithashtu nga AFP, France 24 dhe media të tjera evropiane, duke e vendosur Tiranën në qendër të raportimeve ndërkombëtare.
Nga kauzë mjedisore në krizë politike
Analizat e publikuara nga media si The Independent dhe Kathimerini evidentojnë se protesta ka kaluar përtej kauzës fillestare mjedisore dhe po merr karakter më të gjerë politik, me kërkesa që tashmë lidhen edhe me përgjegjësinë e qeverisë dhe mënyrën e reagimit të institucioneve.
Gjatë protestës u dëgjuan thirrje kundër qeverisë, ndërsa organizatorët deklaruan se lëvizja do të vazhdojë edhe në ditët në vijim.
Ndërkohë, edhe Ambasada e SHBA-së në Tiranë reagoi duke u bërë thirrje të gjitha palëve të tregojnë vetëpërmbajtje dhe të shmangin përshkallëzimin e dhunës.
Përplasje edhe në frontin politik
Kryeministri Edi Rama reagoi përmes rrjeteve sociale, duke dënuar aktet e dhunës dhe duke deklaruar se qeveria nuk do të tërhiqet nga projektet që i konsideron strategjike.
Nga ana tjetër, përfaqësues të protestuesve akuzuan Policinë e Shtetit për përdorim të tepruar të forcës dhe paralajmëruan se do të ndjekin rrugë ligjore ndaj zyrtarëve që, sipas tyre, mbajnë përgjegjësi për ndërhyrjen policore.
Në të njëjtën kohë, vëmendja është përqendruar edhe te personat e shoqëruar dhe arrestuar gjatë protestës, ndërsa mbështetësit e tyre janë mbledhur pranë Komisariatit nr. 3 duke kërkuar lirimin e tyre.
Me tensionet që mbeten të larta dhe me thirrjet për vazhdimin e protestave, dita e 34-t e “Revolucionit të Flamingove” pritet të jetë një tjetër provë për situatën politike dhe rendin publik në vend.